ထို့အပြင် စစ်ကောင်စီမှ အစီအစဉ်ထားသော ရွေးကောက်ပွဲကိုလည်း ဝေဖန်သုံးသပ်ထားပြီး၊ ၎င်းသည် အမှန်တကယ် နိုင်ငံရေး လုပ်ငန်းစဉ်တစ်ရပ် ဖြစ်နိုင်ခြင်းရှိမရှိ၊ သို့မဟုတ် လူထုယုံကြည်မှု ကျဆင်းနေသော အခြေအနေအတွင်း တရားဝင်မှုတစ်ရပ်ကို ဖန်တီးရန် ကြိုးပမ်းသော မဟာဗျူဟာတစ်ခုသာလားဆိုသည်ကို မေးခွန်းထုတ်ထားပါသည်။ ဧည့်သည်၏ အမြင်အရ မေးခွန်း၏ အဓိကမှာ ရွေးကောက်ပွဲ ပြုလုပ်နိုင်မလား ဆိုသည်ထက်၊ အဖွဲ့အစည်းများ ချိုးဖောက်ပြိုကွဲနေပြီး လူထုယုံကြည်မှု လျော့နည်းနေသော အခြေအနေတွင် ထိုရွေးကောက်ပွဲသည် အဓိပ္ပါယ်ရှိနိုင်မလားဆိုသည့် အချက်ပင် ဖြစ်သည်။

နိုင်ငံရေးအပြင်ဘက်တွင်လည်း ဤအပိုင်းသည် အချိန်ကြာမြင့်လာသော အကျပ်အတည်းအတွင်း နေထိုင်ရသော ပြည်သူများ၏ နေ့စဉ်ဘဝအတွေ့အကြုံများကို အဓိကထား တင်ပြထားပါသည်။ မြန်မာနိုင်ငံတစ်ဝန်းရှိ လူထုများသည် နေရာရွှေ့ပြောင်းရခြင်း၊ အသက်မွေးဝမ်းကျောင်းများ ပျက်စီးယိုယွင်းခြင်း၊ ပညာရေးနှင့် ကျန်းမာရေးဝန်ဆောင်မှုများ လက်လှမ်းမမီနိုင်ခြင်း နှင့် တို့အပြင် မသေချာမရေရာမှုများကြောင့် စိတ်ပိုင်းဆိုင်ရာ ဖိအားများကိုလည်း ဆက်လက်ခံစားနေရပါသည်။

ယခင်က တည်ငြိမ်မှုကို ပံ့ပိုးပေးခဲ့သော လူမှုရေးနှင့် အုပ်ချုပ်ရေးဆိုင်ရာ စနစ်များသည် နေရာအချို့တွင် ပြိုကွဲသွားပြီး၊ အချို့နေရာများတွင်လည်း အပိုင်းပိုင်းကွဲကွာသည့် ပုံစံဖြင့် အတည်ပြုလိုက်လျောနေကြရပါသည်။

နောက်ဆုံးတွင် ပေါ်ထွက်လာသည်မှာ အင်အားစုအမျိုးမျိုး၊ အမြင်ကွဲပြားမှုများနှင့် အမြဲပြောင်းလဲနေသော အခြေအနေများကြားတွင် ရှေ့ဆက်လမ်းကြောင်းကို သေချာမြင်နိုင်ရန် ခက်ခဲနေသော နိုင်ငံတစ်ခု၏ ပုံရိပ်ဖြစ်ပါသည်။ သို့ရာတွင် ထိုမသေချာမှုများအတွင်း၌ပင် သာမန်ပြည်သူများ၏ ခံနိုင်ရည်နှင့် သတ္တိသည် အရေးကြီးသော လမ်းကြောင်းတစ်ခုအဖြစ် ဆက်လက်ထင်ရှားနေပြီး၊ ၎င်းတို့သည် ဆက်တိုက်တိုးပွားလာသော အခက်အခဲများကို ရင်ဆိုင်နေဆဲ ဖြစ်သည်။

မန္တလေးတိုင်းအပါအဝင် ဒေသအချို့တွင် တိုက်ပွဲများ၊ လှုပ်ရှားမှုများနှင့် လူရွှေ့ပြောင်းမှုများ ဆက်လက်ဖြစ်ပွားနေပြီး ယင်းအခြေအနေများကြောင့် လူမှုအသိုင်းအဝိုင်းများသည် နေရပ် ပြောင်းရွှေ့ရခြင်း၊ လုံခြုံရေးအတွက် ကိုယ်တိုင်ဖြေရှင်းရခြင်းများကို လုပ်ဆောင်နေရသည်။ ဒေသခံများအတွက် နေ့စဉ်ဘဝသည် အန္တရာယ်နှင့် မသေချာမှုတို့ကြားတွင် တည်ရှိနေသည်။

တစ်ဖက်တွင်လည်း လူငယ်များနှင့် ပြည်သူများသည် အမျိုးမျိုးသော လှုပ်ရှားမှုများမှတစ်ဆင့် မိမိတို့၏အသံကို ဖော်ထုတ်ရန် ကြိုးပမ်းနေကြပြီး ယင်းလှုပ်ရှားမှုများသည် အစပိုင်းတွင် သေးငယ်သော်လည်း အချိန်နှင့်အမျှ ပိုမိုစနစ်တကျ ဖြစ်လာသည်ကို တွေ့မြင်နိုင်သည်။ သို့သော်လည်း ယင်းလှုပ်ရှားမှုများသည် အန္တရာယ်များနှင့် ပြည့်နှက်နေပြီး ပါဝင်သူများအတွက် အန္တရာယ်များမှာလည်း လျှော့နည်းမသွားပေ။

ရွေးကောက်ပွဲနှင့် ဆိုင်သော ဆွေးနွေးမှုများအပေါ်တွင်လည်း သံသယရှိကြသည်။ တရားဝင်မှုအနေအထားအပေါ် သံသယရှိမှုနှင့် ယုံကြည်ထိုက်သော အခြေအနေမရှိမှုတို့သည်

ပြည်သူများအနေဖြင့် နိုင်ငံရေးလုပ်ငန်းစဉ်များအပေါ် သံသယရှိနေကြောင်းကို ထင်ဟပ်စေသည်။

ထို့အပြင် နာဂဒေသနှင့် မန္တလေးဒေသတို့အကြား သွားလာမှုများ၊ နေရာရွှေ့ပြောင်းမှုများလည်း ရှိနေပြီး ယင်းသည် အလုပ်အကိုင်၊ လုံခြုံရေး သို့မဟုတ် အခြားလိုအပ်ချက်များကြောင့် ဖြစ်နိုင်သည်ဟု သတ်မှတ်နိုင်သည်။ ဒေသအလိုက် အခြေအနေများသည် မတူညီသော်လည်း၊ အားလုံးတွင် တူညီစွာတွေ့ရသည်မှာ မတည်ငြိမ်မှုနှင့် မသေချာမှုဖြစ်သည်။

အဆုံးသတ်တွင် ယနေ့မြန်မာနိုင်ငံ၏ အခြေအနေသည် တိုက်ပွဲများ၊ လူမှုရေးလှုပ်ရှားမှုများနှင့် နိုင်ငံရေးမသေချာမှုများ ပေါင်းစည်းနေသော အခြေအနေတစ်ရပ်ဖြစ်ပြီး ပြည်သူများအနေဖြင့် အန္တရာယ်နှင့် မသေချာမှုကြားတွင် နေထိုင်နေကြရသည်။ သို့ရာတွင် ယင်းအခြေအနေများကြားမှ လူမှုအသိုင်းအဝိုင်းအတွင်း ပူးပေါင်းဆောင်ရွက်မှုနှင့် လှုပ်ရှားမှုစိတ်ဓာတ်များ ဆက်လက်တည်ရှိနေခြင်းသည် အရေးကြီးသော အချက်တစ်ချက်ဖြစ်သည်။

ဒီနေ့ Podcast အပိုင်းမှာကတော့...

စစ်အာဏာရှင်တို့ရဲ့ ရွေးကောက်ပွဲကို အများပြည်သူက ဘာကြောင့် တရားမဝင်တဲ့

ရွေးကောက်ပွဲတစ်ခုအဖြစ် သတ်မှတ်နေကြပါသလဲ?

လက်ရှိ မြန်မာပြည်အနှံ့မှာ ဒီရွေးကောက်ပွဲနဲ့ ပတ်သက်ပြီး ဘယ်လို ဖိနှိပ်ခြိမ်းခြောက်မှုတွေ ဖြစ်ပွားနေပါသလဲ?

ပြည်သူတွေရဲ့ ရင်ထဲမှာ အမှန်တကယ် မျှော်လင့်တောင့်တနေတဲ့ နိုင်ငံရေးအဖြေက ဘာဖြစ်မလဲ?

အစရှိတဲ့ မေးခွန်းပေါင်းများစွာကို ဧရာဝတီတိုင်းနှင့် ပဲခူးတိုင်းဒေသကြီးအတွင်း နေထိုင်ကြတဲ့ ပြည်သူနှစ်ဦးရဲ့ ကိုယ်တွေ့ရင်ဆိုင်ကြုံတွေ့ချက်တွေ ၊ သူတို့ပတ်ဝန်းကျင်မှာရှိတဲ့ ဖြစ်ရပ်မှန်တွေနဲ့ ပေါင်းစပ်ပြီး တင်ဆက်ပေးထားပါတယ်။

နိုင်ငံတကာမျက်မှောက်ရေးရာတွေမှာ အာဏာရှင်တွေရဲ့ ဝါဒဖြန့်မှုတွေကြောင့် ပြည်သူတွေ အမှန်တကယ်ခံစားနေရတဲ့ အခက်အခဲတွေကနေ ဖုံးကွယ်ခြင်း ခံထားရနိုင်ပါတယ်။ ဒါကြောင့် မြန်မာပြည်တွင်းက အခြေအနေမှန်နဲ့ ပြည်သူတွေရဲ့ အသံစစ်စစ်ကို သိရှိနားလည်နိုင်ဖို့ ဒီ Podcast လေးကို အဆုံးထိ နားဆင်ကြည့်ရှုပေးကြဖို့ ဖိတ်ခေါ်လိုက်ရပါတယ်။

သူမသတိမထားမိခဲ့သည်ကား

မျိုးစေ့နှင့်ပတ်သတ်လျှင် ချဉ်ပေါင် ကန်စွန်းလောက် ဗဟုသုတဖြင့် ပညာရှင်များကို အမိန့်ပေးမည့် မိုးကျရွှေကိုယ် တဖြစ်လဲ စစ်အရာရှိဟောင်း

အထက်လူကြီးများကိုပင် ဖြစ်သည်။ ကဏ္ဍပေါင်းစုံကို အုပ်ချုပ်နိုင်သည်ဟူသော ကလေးအတွေးဖြင့် နေရာယူခဲ့ကြသည့် စစ်တန်းလျားပြန်များကြောင့် ကဏ္ဍပေါင်းစုံများစွာ ဆုတ်ယုတ်ခဲ့ရသည်။

နိုင်ငံအ‌တော်များများကို စိုက်ပျိုးရေးကဏ္ဍဖြင့် လေ့လာဆည်းပူးခဲ့သော သူမသည် မြန်မာနိုင်ငံ၏ စိုက်ပျိုးရေးကဏ္ဍအတွက် အခွင့်အလမ်းများစွာကို ဖန်တီးချင်ခဲ့သည်။ သို့သော် သူမအတွက် အခက်အခဲများစွာက ဆီးကြိုနေခဲ့သည်။

စပါးဈေးကွက်၊ တောင်သူကြီးများ၏ အခက်အခဲ၊ လုပ်စားခံရသော နိုင်ငံပိုင် မျိုးစေ့မြေနေရာများ၊ သုံးစားမရသော ဆည်မြောင်းတာတမံစနစ်များနှင့်

အနာဂါတ်စီမံချက်များကို သူမ ပြည့်ပြည့်စုံစုံရှင်းပြရင်း CDM လုပ်ရခြင်းရည်ရွယ်ချက်များကို မျှဝေခဲ့သည်။

ဆုံးရှုံးမှုကြီးသော သူမ၏ တော်လှန်ရေးခရီးရှည်နှင့် မိခင်တဦး၏ သောက၊ အတ္တနှင့် ဓမ္မ လွန်ဆွဲပွဲ စသည်တို့ကို စုံစုံလင်လင် ဖော်ပြထားသော

ဆရာမမီးမီး၏ "စိုက်ပျိုးတော်လှန် စစ်ကျွန်မခံ"

Podcast ကို နားဆင်နိုင်ပြီဖြစ်ပါသည်။

Professional ကျကျ လုပ်ကိုင်သူ၊ သူမ၏ကလေးတွေအတွက် မအားမလပ်သည့်ကြားက အချိန်ပေးတတ်သူ၊ ဘ၀ကို ခေတ်မီမီ ဖြတ်သန်းနေသော မိခင်ကောင်း၊ အမျိုးသမီးကောင်း တစ်ဦးဖြစ်သော သူမ။

စစ်အာဏာသိမ်းမှု စတင်ချိန်တွင် သူမ၏ဘ၀တွေ ဇောက်ထိုးမိုးမျှော် ဖြစ်တော့သည်။ စစ်အာဏာသိမ်းမှု၏ နောက်ဆက်တွဲပြဿနာများကို သူမ ကောင်းကောင်းနားလည်ထားသည်။ ထို့ကြောင့် ဆန္ဒပြပွဲများကို အားသွန်ခွန်စိုက်ပါ၀င်ရင်း သူမ ရှာဖွေစုဆောင်းထားသမျှကို နွေဦး တော်လှန်ရေးအတွက် ပုံအောခဲ့တော့သည်။

ဆရာမသော်ဟာ လက်ရှိအချိန်အထိ နွေဦးတော်လှန်ရေးကို အားသွန်ခွန်စိုက် ပါ၀င်နေသော၊ လေးစားထိုက်သော သူတစ်ဦးဖြစ်သည့်အပြင်

သာမန်အမျိုးသမီးတစ်ဦးအတွက် မတွေးဖူးမကြုံဖူးလောက်တဲ့ အခက်အခဲမျိုးစုံကို ကျော်ဖြတ်ရင်း တော်လှန်ရေးခရီးကို ရှေ့ဆက်နေသော သူမရဲ့ ခိုင်မာတဲ့ ခံယူချက် အတွေ့အကြုံတွေဟာ ကျတော်တို့ကိုတောင် ပါးစပ်အဟောင်းသား ဖြစ်စေရပါတယ်။

ဆရာမသော်ဟာ သူမရဲ့မျိုးဆက်တခုစာ တာ၀န်ပျက်ကွက်မှုကြောင့် လက်ရှိလူငယ်တွေ အသက်တွေရင်းနေရတယ်လို့ ခံယူထားသူတစ်ဦးဖြစ်ပြီး သူမအသက်ရှင်နေသမျှကာလပတ်လုံး တော်လှန်ရေးအပေါ် အကောင်းဆုံး ကြိုးစားကူညီနေသော အမျိုးသမီးတစ်ဦးလည်းဖြစ်ပါတယ်။

ကင်ဆာရောဂါခံစားနေရသော သားငယ်အတွက် အချိန်ပေးဖို့ရာ တော်လှန်ရေးကို သွေဖယ်ရမှာ ကြောက်မိတဲ့သူမဟာ နောက်ဆုံးမှာ တော်လှန်ရေးကိုပဲ ရွေးချယ်ခဲ့တဲ့ သူမ။ ဒေါ်အောင်ဆန်းစုကြည်ကို လေးစားအားကျသည့်အပြင် အမေစုကဲ့သို့ စွန့်လွတ်ခြင်းမျိုးကို ရွေးချယ်ခဲ့တဲ့ သူမအကြောင်း၊ တော်လှန်ရေးအပြီးသတ်မနိုင်ခင် တက်မထောင်ဘဲ နိုင်ရာတာ၀န်ကို ဝိုင်းထမ်းကြဖို့ မျက်ရည်တွေကြားကနေ ပြောပြခဲ့တဲ့ သူမအကြောင်းကို တော်လှန်ခြင်းများနှင့်ခေတ်သစ်မြန်မာပြည် podcast မှာ နားဆင်နိုင်ပြီဖြစ်ပါသည်။

သူ့အိပ်မက်တွေအကောင်အထည်ဖော်နေသော်လည်း အာဏာသိမ်းမှုဖြစ်လာသည့်အချိန်တွင် တုံ့ဆိုင်းမနေ။ ရသည့်နည်းဖြင့် ဆန္ဒပြသည်။ သို့သော် စစ်ကောင်စီက အလွတ်မပေး၊

အင်းစိန်ထောင်နန်း စံရတော့သည်။ ထောင်တွင်းနေ့ရက်တွေကို စိတ်အားမငယ်၊ ပညာပင် ရသေးသည်ဟု သူဆိုသည်။ ငါးလကြာ၊ ပြန်လွတ်လာပြီး ထောင်တွင်း နိုင်ငံရေးအကျဉ်းသားတွေအတွက် စာအုပ်၊ရိက္ခာ၊ လိုအပ်ရာရာတွေ သူပို့သည်။

ရည်ရှည်ရပ်တည်နိုင်ရန် အလုပ်ပြန်လုပ်သည်။ သို့သော် သူ့အတွက်သေချာသည်ကား စစ်ကောင်စီလက်အောက်တွင် ဘယ်အရာမှ မရှင်နိုင်သည်ကို သူသိထားသည်။ ထောင်မှ လွတ်ပေးသော်လည်း တိတ်တဆိတ် နောက်ယောင်ခံမှုများနှင့် မရေရာသော အာမခံချက်တွေကို ကျောခိုင်းပြီး တတိယနိုင်ငံသို့ ရှောင်ထွက်ခဲ့သည်။

ရရာအလုပ် လုပ်ရင်း ရေကြည်ရာ မြက်နု ရှာတော့မည်ဟု သူဆိုသည်။ တော်လှန်ရေး အစိုးရအပေါ် လျော့တိလျော့ရဲဖြစ်နေသည်ဟုသာ သူထင်သည်။ ပြည်သူ့အစိုးရဖြစ်လင့်ကစား ပြည်သူ့ရင်ခွင်နှင့် ဝေးနေသောကြောင့် ဆိုးနေသော သားတွေ ရှိနေသည်ဟု သူပြောသည်။ ပုံမှန်အခြေအနေမှာ လက်ခံနိုင်စရာရှိသော်လည်း လက်ရှိအချိန်အတွက် တာ၀န်နှင့် အခွင့်အရေးကို နားလည်သင့်ပြီဟု သူမျှဝေခဲ့သည်။ ထိုသူသည် အင်ဂျင်နီယာ Gym နည်းပြ ကိုမင်းသန့်ပင် ဖြစ်ပါသည်။ သူ၏ဘ၀အကြောင်း တစေ့တစောင်းကို

တော်လှန်ခြင်းများနှင့် ခေတ်သစ်မြန်မာပြည်တွင် လေ့လာနားဆင်နိုင်ပြီဖြစ်ပါသည်။

သူမ ပေးတဲ့ သင်တန်းတွေကနေ တဆင့် မိမိကိုယ်မိမိ လက်ခံသွားနိုင်တဲ့သူတွေ၊ ကိုယ့်ဘ၀ကိုယ် ယုံကြည်တတ်သွားသူတွေ မနည်း။ သူ့အမည်ကား ပိုင်။

အမျိုးသမီးချင်း စိတ်၀င်စားသူတစ်ယောက်အဖြစ် မိမိကိုယ် မိမိ လက်ခံခဲ့သူ၊ ခန္ဓာကိုယ်အောက်ပိုင်း ဆုံးရှုံးလုနီးပါးအထိ ဆန္ဒပြခဲ့သူ၊ ပုံမှန်လမ်းပြန်လျှောက်ဖို့ တစ်နှစ်ကျော်ကြာ ကြိုးစားခဲ့ရသူ အခက်အခဲများစွာကို မေတ္တာဖြင့် ကျော်ဖြတ်ခဲ့သူတစ်ယောက်၏ ဘ၀အကြောင်း။

တော်လှန်ရေးအပေါ် မျှော်လင့်ချက်ကြီးသော လူငယ်တစ်ယောက်ဖြစ်သည့်အပြင် ပြည်သူ တစ်ယောက်ချင်းစီတိုင်းကို ရသင့်ရထိုက်သော အခွင့်အရေးတိုင်း ရစေချင်သော သူမ။

ဘ၀ရည်မှန်းချက်ကို နည်းပြကောင်းတစ်ယောက်ဖြစ်လာဖို့ သက်မှတ်ထားသူ၊ တော်လှန်ရေး၏ နိုင်ခြင်း ရှုံးခြင်း၏ အရေးပါမှုကို ရိုးရိုးရှင်းရှင်း မြင်သာလာအောင် ပြောပြနိုင်သော သူမ၏ စကားများကို တော်လှန်ခြင်းများနှင့် ခေတ်သစ်မြန်မာပြည်မှာ နားဆင်နိုင်ပြီဖြစ်ပါတယ်။

ငယ်ရွယ်စဉ်ကတည်းက စစ်အာဏာရှင်၏ ဆ်ိုးသွမ်းရက်စက်မှုကို စာအုပ်စာပေမှတဆင့် ကိုယ်တွေ့ကြုံရပြီး ရဟန်းဘ၀မှစ၍ စစ်အာဏာရှင်ဆန့်ကျင်ရေး မြေအောက်တော်လှန်ရေးကို ဦးဆောင်ခဲ့သူ။

ဘာသာ သာသနာကို ခုတုံးလုပ်တတ်သော စစ်အာဏာရှင်၏ ကြောင်သူတော်မျက်နှာဖုံးကို ခွါချပေးနိုင်ခဲ့သောသူ။

ပြည်သူလူထု၏ အခက်အခဲနှင့် ဆင်းရဲမွဲတေမှု မြစ်ဖျားခံရာသည် စစ်အာဏာရှင်စနစ်ဖြစ်သည်ကို ပိုမိုထင်ရှားအောင် ထောက်ပြပေးနိုင်ခဲ့သော

ရွှေဝါရောင် အရေးအခင်း၏ ဦးဆောင်သူ ဥူးဂမ်ဘီရ။

လက်ရှိ နွေဦးတော်လှန်ရေးအပေါ် နိုင်သမျှ ၀န်ထမ်းရင်း သူ၏အတွေ့အကြုံ၊ သုံးသပ်ချက်၊ ဘ၀ဖြတ်သန်းမှုများကို တော်လှန်ခြင်းများနှင့်ခေတ်သစ်မြန်မာပြည်မှ ဆက်သွယ်မေးမြန်းထားသည်ကို အပိုင်း ၃၁ တွင် နားဆင်နိုင်ပြီဖြစ်ပါသည်။

ဆေးရုံက လှည့်မကြည့်၊ Blacklist အသွင်းခံရသော်လည်း သူမမှု။ ရသမျှအားနှင့် ရှေ့ဆက်သည်။ သူ့ပါတနာနှင့်အတူ ကယား(ကရင်နီ) ဖက်ကို တော်လှန်ရေး ခရီးရှည် ဆက်ခဲ့ရသည်။ သူ၏ တောတွင်းအတွေ့အကြုံများကား အိမ်မက်ဆန်ဆန်ပင်။ ငယ်ငယ်က လက်ပြဖူးသော လေယာဉ်သံကြားလျှင် ပြားနေအောင်၀ပ်ရာမှနောက်ပိုင်း ထမင်းစားပင်မပြတ်တော့။ ရေမရ၍ အရေပြားရောဂါပေါင်းစုံကို ဂရုစိုက်ပေးရသည်။ COVID အတွက်လည်း ရှိတာသုံး၍ အဆင်ပြေအောင် ကျော်လွှားခဲ့ရပုံတွေ၊ ဗိုက်ပွင့်လူနာကို အသက်ကယ်ခဲ့ရပုံတွေကို ဘယ်တော့မှ မေ့တော့မည်မဟုတ်ဟု သူဆိုသည်။

ကိုဗစ်တာရဲ့ စိတ်လှုပ်ရှားစရာ အားတက်စရာ အံအားသင့်စရာ များစွာကို ယခု podcast တွင် နားဆင်နိုင်မှာ ဖြစ်ပါတယ်။

သို့သော် သူရသမျှ အိမ်နှင့်အတိုက်အခံလုပ်ကာ ရှေ့သို့ပို့သည်။ ရှာသမျှ မလောက်၊ စိတ်၀င်တစား မေးမိသည်။ သူ့အဖြေကား မိမိအနာဂါတ်အပါအ၀င် အနာဂါတ်ပေါင်း များစွာအတွက် ရင်းနှီးမြုပ်နှံမှုလုပ်သည်ဟု ဆိုသည်။

ဆီရဆီ၊ဆန်ရဆန်၊ ရသမျှ အကုန်ပို့ပေးသည်။ လက်တွဲဖော်ကောင်းနှင့်လည်း ဆုံ၍ စိတ်တူကိုယ်တူ အပြိုင်အဆိုင် ပံ့ပိုးကူညီကြသည်။

သူထင်မထားတာ တခုရှိသည်ဟု ၀န်ခံသည်။ ဘ၀ရင်း အသက်ရင်းသော သူတွေများခဲ့သလောက် ကျောင်းတွေ တက္ကသိုလ်တွေ အလုအယက် တက်ကြသူတွေလည်း များသည်။ လူငယ်တွေ အဲ့လောက် နှလုံးသားနှင့် ဦးနှောက် သိမ်ဖျင်းမည်ဟု သူမထင်ခဲ့ဟု ဆိုသည်။

ဘာတွေဘယ်လိုပင် ဖြစ်ပါစေ အားနဲ့မာန်နဲ့ ရှေ့ဆက်နေကြသော ကိုကျော်လို အဖိုးတန်ပြည်သူများက နွေဦးတော်လှန်ရေးကို ဖော်ဆောင်နေကြောင်း ယခု podcast မှာ နားဆင်နိုင်ပြီဖြစ်ပါတယ်။

Podcast ရဲ့ အနှစ်သာရဖြစ်တဲ့ နားဆင်ရင်း တွေးခေါ်နိုင်မယ့် အကြောင်းအရာတော်တော်များများကို ဆွေးနွေးပြောပြသွားတဲ့ podcast တစ်ခုလည်း ဖြစ်တာကြောင့် ပေါ့ပေါ့ပါးပါးနားဆင်ရင်း လေးလေးနက်နက်တွေးစရာတွေ လုပ်စရာတွေ မြင်လာမယ်လို့ ယုံကြည်ပါတယ်။

ကျတော်တို့နိုင်ငံမှာ ဆရာဇင်ဇေလွင်လို ကြယ်ငါးကောက်သူတွေ ရှိခဲ့ပါတယ်။ ယခုကာလမှာဆိုရင် ပိုလို့တောင် များပါသေးတယ်။ အဲ့လို လူတွေဟာ အခုဆို ကောင်းကင်မှာ တရှိန်ထိုးတောက်ပနေတဲ့ ကြယ်တွေ မကြွေစေဖို့အရေး နိုင်ရာတာ၀န်ကို မျှထမ်းနေကြပါတယ်။ ရှိသမျှ ရှာထားသမျှတွေကို ချရင်းပြီး လောင်းကြေးထပ်ခဲ့တဲ့ ဆရာဇင်ဇေလွင်ရဲ့ တော်လှန်ရေးခရီး ဒုတိယပိုင်း ကြယ်ငါးကောက်သူနှင့် ကြယ်ကြွေနိုင်ငံကို ကြိုးစားဖန်တီးပေးလိုက်ပါတယ်။ နားဆင်ရင်း နွေဦးတော်လှန်ရေးအတွက် တွေးနိုင် ကြံနိုင် အားဖြည့်နိုင်ကြပါစေခင်ဗျာ။

သူတင်ကိုယ်တင် ပြောတတ်သူ၊ စာပေကို မြတ်နိုးပြီး မိမိကြိုးစားမှုဖြင့် မိမိဘ၀ကို ပြုပြင်ပြောင်းမနိုင်သည်ဟု ယုံကြည်တတ်သူ၊ ပညာကို လေးစားပြီး ပညာဖြင့် အသက်မွေး၀မ်းကြောင်းပြုရင်း နာမည်တစ်လုံးဖြင့် ရပ်တည်နိုင်သူတဦး။

ဆရာဇင်ဇေလွင်ဟာ တချိန်က စစ်ကောင်စီကို ဆွေးနွေးညှိုနှိုင်းပြီး တရားမ၀င် အာဏာသိမ်းမှုကို အဆုံးသတ်နိုင်သည်ဟု ယုံကြည်ဖူးသည်။ ကိုယ့်ဘ၀ကိုယ် ပြောင်းလဲနိုင်စွမ်းသည် အစိုးရတွင် မရှိဘဲ မိမိကိုယ်တိုင်တွင်သာ ရှိသည်ဟု လက်ခံပြီး ဘ၀ကို ရုန်းကန်တည်ဆောက်ခဲ့သူမို့ ကိုယ့်စိတ်ဖြင့် စစ်တပ်ကို နှိုင်းပေးခဲ့သည်။ သို့သော် သူမျှော်လင့်ထားသလောက် မြန်မာစစ်တပ်တွင် အတွေးအခေါ် အမျှော်အမြင်မရှိကား အစအနပင် မရှိပေ။

ဆရာဇင်ဇေလွင်၏ ပြောင်းလဲပြုပြင်တတ်သည့်စိတ်ထားကို ကျတော်တို့‌ podcast တွင် လေးစားဖွယ်တွေ့ရသည်။ ယခု နွေဦးတော်လှန်ရေးတွင် ဆရာသည် ခံယူချက်အချို့ကို အတွေ့အကြုံနှင့် သုံးသပ်ချက်အပေါ်မူတည်ပြီး လက်ခံပြောင်းလဲတတ်သည်ကိုလည်း မြင်ရသည်။

တိုင်းရင်းသားပြည်သူများနှင့် လက်နက်ကိုင် းအဖွဲ့အစည်းများက ဗမာလူမျိုး၏ လူစွမ်းကောင်းဝါဒကို ကြောက်သည်။ ကောက်ရိုးမီးစိတ်ဓာတ်ကို ကြောက်သည်။ ထို့ကြောင့် ဗမာလူထုဟာ စစ်တပ်အမြစ်မပြတ်မချင်း ရှေ့ဆက်မည်လော ဟူသည့် အတွေးရှိသည်။ ထိုအတွေးအခေါ်ကို ချေဖျက်နိုင်သည်မှာ ပြည်သူလူထု၏ တော်လှန်ရေးအပေါ် တစိုက်မတ်မတ် အားစိုက်တတ်ခြင်းသည်သာလျှင်ရှိသည်ဟု ဆရာဇင်ဇေလွင် ပြောသည်။

နွေဦးတော်လှန်ရေးအတွက် ဆရာဇင်‌ဇေလွင်ပြောပြသော အတွေ့အကြုံ အတွေးအခေါ်နှင့် အချက်အလက်များသည် အလွန်တန်ဖိုးရှိပြီး အထောက်အကူပြုသောကြောင့် ဆက်ဆက်နားဆင်ပေးရန် ကျတော်တို့

တော်လှန်ခြင်းများနှင့် ခေတ်သစ်မြန်မာပြည်မှ တိုက်တွန်းတင်ဆက်လိုက်ရပါတယ်။

မကြုံဖူးတာတွေကြုံရ ကြားရသည့်အခါ သူအံ့ဩရသည်။ ဘ၀မှာ မကြုံဖူး မကြားဖူးသည်များကို မျက်ဝါးထင်ထင်တွေရချိန်တွင် အရင်ဆုံး ကိုယ်ချင်းစာမိသည်ကား တိုင်းရင်းသားများ။

ဘ၀ကို ခပ်ပေါ့ပေါ့ဖြတ်သန်းခဲ့သည်မဟုတ်သော်လည်း ပေါ့ပေါ့ပါးပါးနေတတ်ခဲ့သော သူကိုယ်သူရှက်တတ်ပြီ။ ကိုနစ်ကီ စစ်သင်တန်းတက်သည်။ စစ်လက်နက်တပ်ဆင်ရေးလုပ်သည်။ နည်းပညာသမားပီပီ နည်းပညာအကူအညီပေးသည်။ လက်ရှိအချိန်တွင် နိုင်သမျှ အကုန် ကြုံးလုပ်ရင်း စစ်အာဏာရှင် အမြစ်ဖြတ်ပွဲကို ပါ၀င်နေသည်။ ရေပေါ်ဆီသူငယ်ချင်းတွေအတွက် စကားလက်ဆောင်အချို့လည်း ပါးလိုက်သေးသည်။ အနုပညာရှင်များ အချိန်မတန်ဘဲ ကြွေလွှင့်ရမှုအပေါ် သူကြေကွဲရသည်။

တမိသားစုလုံးပြေးနေရသော်လည်း ကိုနစ်ကီ စိတ်မပျက်၊ ရှေ့ဆက်ဆဲပင်ဖြစ်သည်။ သူလိုလူမျိုးများစွာ နွေဦးတော်လှန်ရေးတွင် ပါ၀င်နေကြသည်။

ဆက်လက် ပါ၀င်နေကြလိမ့်အုံးမည်။

ထို့နောက် ဖခင်ဆုံးပါးပြီး ဆုံးဖြတ်ချက်တခုကို ခိုင်ခိုင်မာမာချလိုက်သည်။ မြန်မာနိုင်ငံတွင် ဆက်နေ၍ မဖြစ်တော့။ ကြိုးကြိုးစားစား ရထားသော ဘွဲ့နှင့် လုပ်သက် အတွေအကြုံများက စစ်အာဏာရှင်လက်အောက်တွင် ဘာတန်ဖိုးမှ မရှိ။ အင်ဂျင်တစ်ယောက်ကို လစာ ၁သိန်း ၈သောင်း( တလ $ ၅၀) ခန့်ဖြင့် သတင်းစာမှ တရား၀င် ခေါ်နေသော နိုင်ငံတွင် သူ့အတွက် နေရာ မရှိတော့။ တွယ်တာစရာ မိခင်ရော ဖခင်ပါမရှိ၊ အမနှင့် ညီငယ်ကလည်း တနေရာစီ။ သူ့အသက်မွေး၀မ်းကြောင်းနှင့် ဘာမှမဆိုင်သော အရာတခုကို မျက်စိမှိတ် ရွေးရင်း နိုင်ငံရပ်ခြားတွင် စာဖိုမှူးတစ်ယောက်ဖြစ်လာသော စက်မှုအင်ဂျင်နီယာဘွဲ့ရ ကိုထက်။ လောကကြီးကို ခက်ထေ့ထေ့ အမြဲပြုံး၍ကြည့်တတ်သောသူ၊ ထိုသူ၏ ဘ၀အချို့အကွေ့ကို တော်လှန်ခြင်းများနှင့် ခေတ်သစ်မြန်မာပြည်တွင် နားဆင်နိုင်ပါပြီ။

သူမ ဘ၀ကို ပုံမှန်ဖြတ်သန်းနေရသော်လည်း သူမခုံမင်သည်။ မငြိမ်း မမြင်သည်ကား သူမကို စောင့်ကြိုနေသော ဘ၀လှည့်ကွက်များ သမိုင်းဓာတ်ပုံများ။ သူမပြောပြသည်ကား " ကျမကိုယ်ကျမ စစ်ထဲမှာ သတင်းယူရသလို ဓာတ်ပုံတွေရိုက်ရလိမ့်မယ်လို့ အိပ်မက်တောင် မမက်ဖူးပါဘူး၊ အခုက တကယ့် စစ်ပွဲထဲရောက်နေသလိုပဲ။ ပြဿနာက တဖက်က လက်နက်နဲ့၊တဖက်က လက်နက်မဲ့"။

အမှတ်တရမဖြစ်ချင်သော အမှတ်တရများထဲမှ လှိုင်သာယာအကြောင်းကို သူမ ပြည့်ပြည့်စုံစုံ ပြောပြသွားသည်။ စိတ်ရောကိုယ်ပါ ချုံးချုံးကျခဲ့ရသော သူမရဲ့ ဘ၀ကို ဘယ်၍ဘယ်ပုံ ပြန်လည်ပြုပြင်ခဲ့ရသည်ကို မျှဝေခဲ့သည်။

သူမ၏ သမိုင်းတမျက်နှာကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်ပြီဖြစ်ပါသည်။

စား၀တ်နေရေးအတွက် မွေးမြူရေး၊စိုက်ပျိုးရေးကို တစိုက်မတ်မတ် အားကြိုးမာန်တက် လုပ်ကိုင်ကြပြီး ပညာရေး၊ ကျန်းမာရေးကို ခက်ခက်ခဲခဲ ကြိုးစားကြရသော နေရာ။

စစ်အစိုးရအဆက်ဆက်ရဲ့ ဖိနိုပ်မှုကို ခါးစီးခံပြီး ဘ၀ကို ခက်ခက်ခဲခဲ အသက်မွေးရသော နေရာ။

ကိုဒေးဗစ်ဟာ သူ့ဘ၀ကို အရှုံးမပေး၊ ဆရာ၀န်တစ်ယောက်ဖြစ်လာသည်အထိ ရုံးကန်ခဲ့သည်။ ထို့နောက် မွေးရပ်မြေကို ပြန်ပြီးအလုပ်အကျွေးပြုသည်။ ကျန်းမာရေး ပညာရေး ချို့တဲ့သော သူ့လူမျိုးတိုးတက်ရေးအတွက် အလွန်ကြိုးပမ်းအားထုတ်နေသူလည်း ဖြစ်ပါတယ်။

လက်ရှိတော်လှန်ရေးမှာ ချင်းတောင်တန်းဒေသဟာ စစ်အာဏာရှင်ကို ရွပ်ရွပ်ချွံချွံခုခံတိုက်ခိုက်နေသော နေရာတစ်ခုဖြစ်ပြီး အကျိုးဆက်အနေနဲ့ အစားအစာ ၊ဆေးဝါးနဲ့ ထောက်ပံ့ရေးပစ္စည်းမှန်သမျှကို ဖြတ်တောက်ခံနေရတဲ့နေရာလဲဖြစ်ပါတယ်။

ပါရာစီတမောလို အကိုက်အခဲပျောက်ဆေးပင်ရှာမရ၊ မရှိ၊ရှိတာသုံးပြီး ရှေ့ဆက်နေသော သူတို့ရဲ့ဘ၀၊ လွတ်လပ်ရေးရပြီးကတည်းက ဆုံးရှုံးလိုက်ရသော သူတို့ရဲ့ လွတ်လပ်ခွင့်တွေ၊ အခွင့်အရေးတွေအတွက် ပြန်လည် မျှော်လင့်ရနိုင်သော နွေဦးတော်လှန်ရေးအတွက် ချင်းတမျိုးသားလုံးဟာ ကြံ့ကြံ့ခံထားဆဲဖြစ်ပါတယ်။ သူတို့ရဲ့ ဘ၀တွေ၊မျှော်လင့်ချက်တွေနဲ့ ကြိုးစားအားထုတ်မှုတွေရဲ့ တစိတ်တပိုင်းကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်ပြီဖြစ်ပါသည်။

မကြာဖြူဟူသော အမည်ဖြင့်လိုက်ဖက်အောင် ကြိုးစားရင်း CDM ၀န်ထမ်းဘ၀ကို ကျေကျေနပ်နပ်ခံယူထားရင်း တော်လှန်ရေးခရီးကို တရွေ့ရွေ့ဆက်နေသည်။ သူမပြောသည် " ထောင်ထဲမှာ မျှော်လင့်ချက် တပွေ့တပိုက်ဖြင့် ‌စောင့်နေသူတွေ လူမျိုးစုံ၊ ပြည်သူမျိုးစုံ။ ကျမတို့နိုင်မှ ဖြစ်မည်" ဟုဆိုသည်။

စစ်ကိုင်း၊ကရင်နီ၊ ချင်းတို့ဌာနီမှစလို့ အဝေးရောက် CDM များ ခံစားနေရမှုတို့ကို လျစ်လျူမရှုသင့်ဟု ထပ်လောင်းပြောပြသေးသည်။

မျက်ရည်တွင်တွင် ကျခဲ့ရသော ညများကို ဖြတ်ကျော်ရင်း စိတ်တည်ငြိမ်အောင် ကြိုးစားရင်း ရှေ့ဆက်နေသူ။ တော်လှန်ရေးအတွက် အပြောင်းအလဲဖြစ်မည့် ကာလအတွက် အားလျော့စရာတွေ ရှိသော်လည်း အားလျော့၍ မဖြစ်။ စစ်ကောင်စီ၏ တရားမ၀င်မှုကို အမြန်ဆုံးဖြုတ်ချဖို့ ပြည်သူများ မျှော်လင့်ရင်း ကြံ့ကြံ့ခံဖို့ ဘ၀တူများကို သူမ အားပေးလျက်ရှိသည်။

သူမ၏ အတွေ့အကြုံ၊ အမြင်နှင့် တော်လှန်ရေးအပေါ် သုံးသပ်ဆင်ချင်မှုတို့ကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်ပြီဖြစ်ပါသည်။

ကျတော်တို့အများစုက စစ်အာဏာရှင်တော်လှန်ရေးကြောင့် စိတ်ပင်ပန်း လူပင်ပန်းဖြစ်ပြီး အထီးကျန်ဆန်သော ခံစားချက်ကို ခပ်စိတ်စိတ် တွေးမိ စဉ်းစားမိဖြစ်လာတတ်ပါတယ်။ ကိုယ်နဲ့အတူ စိတ်တူကိုယ်တူ ပြည်သူများစွာက အတွင်းရော အပြင်မှာပါ အရှိန်အဟုန်နဲ့ ရှေ့ဆက်နေတာကို သတိရဖို့အရေးကြီးပါတယ်။

ဆရာကန်နပ်ဝေါင်ဟာ မြန်မာစာပေ တိုးတက်တွင်ကျယ်ရေးအတွက် တဖက်တလမ်းကနေ ကြိုးစားနေတဲ့ ဘာကလေတက္ကသိုလ်က မြန်မာစာဆရာတစ်ယောက်ဖြစ်ပါတယ်။ ၈၈ ကာလမှာ မိသားစုနဲ့အတူ အမေရိကန်နိုင်ငံ၌ ခိုလှုံပြီး နိုင်ငံသားဖြစ်လာခဲ့တဲ့သူတစ်ယောက်ဖြစ်ပါတယ်။

စာပေနဲ့ယဉ်ကျေးမှုကို မြတ်နိုးတဲ့ Kenneth Wong အတွက် မြန်မာစာပေကို တွင်ကျယ်စေချင်သည်။ မြန်မာစာပေကို ကမ္ဘာ့နိုင်ငံတွေမှာ လူရိုသေ ရှင်ရိုသေ ဖြစ်လာစေဖို့ နိုင်ငံတည်ငြိမ်ဖို့လိုကြောင်း၊ သမိုင်းကြောင်းအစဉ်အလာရှိသောနိုင်ငံအတွက် လေ့လာချင်သူတွေများကြောင်း၊ စစ်အာဏာရှင်မရှိသောဖဒရယ်နိုင်ငံသစ်ဆိုလျှင် စာပေယဉ်ကျေးမှု လွန်စွာတိုးတက်ဖို့ အလားအလာရှိကြောင်း ပြောပြဆွေး‌နွေးခဲ့ပါတယ်။

တိုင်းရင်းသားစကားတွေကိုလည်း ထိန်းသိမ်းစောင့်ရှောက်ဖို့နဲ့ ပြန့်ပွားဖို့ကြိုးစားသင့်ကြောင်း၊ လူများစုဖိနိုပ်မှုဆိုတာ နိုင်ငံအလိုက်ဖြစ်နေတာ ဖြစ်တဲ့အတွက် ဥပဒေ၊ ယဉ်ကျေးမှု၊ စာပေနဲ့သာ ထိန်းကွပ်နိုင်ကြောင်း စတဲ့ စိတ်၀င်စားဖွယ်အကြောင်းအရာတွေကို တော်လှန်ခြင်းများနှင့်ခေတ်သစ်မြန်မာပြည် podcast မှာ နားဆင်နိုင်ပါပြီ။

မင်းအောင်လှိုင် အာဏာမသိမ်းခင်အထိ အကုန် အဆင်ပြေသည်။ သို့သော် စစ်အာဏာရှင်၏ စနက်ကို မည်မှ ပြေးမလွတ်၊ အကုန် ခါးစည်းခံကြရသည်။ သူမ၏ သားတစ်ယောက် သမီးနှစ်ယောက် သုံးယောက်လုံး ဆန္ဒပြပွဲတွင် ရှေ့ဆုံးက ပါသည်။ သမီးကြီးက ပိုဆိုးသည်။ သမဂ္ဂဥက္ကဌဖြစ်သင့်အပြင် စစ်သင်တန်းပါ သွားတက်သေးသည်။ ဤသို့ဖြင့် အိမ်၊ကား၊နေရာ အကုန်စွန့်ပြေးရတော့သည်။

သားသမီးများအတွက် အကုန် ပြင်ဆင်ပေးထားသမျှ သဲထဲရေသွန်ဖြစ်ကာ ခင်ပွန်းသည်ကလည်း ကျန်းမာရေးမကောင်းပေ။ ထို့အပြင် အခြားနိုင်ငံသို့ ခိုး၀င်အဖြစ် တိမ်းရှောင်ရပြန်သည်။ ပြေးရသူတို့၏ အိပ်မက် တတိယနိုင်ငံအိပ်မက်ကို မိသားစုနှင့် အမိုး မက်သည်။

သို့သော် ရွှေပြည်တော်ကား မျှော်တိုင်း ဝေးနေသေးသည်။ အမိုး၏ အိပ်မက်များ အမြန်ဆုံးအကောင်အထည်ပေါ်စေရန်

#တော်လှန်ခြင်းများနှင့်ခေတ်သစ်မြန်မာပြည် မှ ဆုတောင်းပေးရင်း အားပေးရပ်တည်လျက်။

သူ၏ ခံယူချက်၊ အတွေးအမြင်များနှင့် လုပ်ဆောင်ချက်များက လေးစားစရာကောင်းသည်။ ပိုမိုလေးစားရသည့်အကြောင်းကား သူ၏ နိမ့်ချတတ်မှု။ စကားပြောယဉ်ကျေးသည်။ ပွင့်လင်းသည်။ သူ့၏စိတ်ဓာတ်ကို စကားပြောကြည့်လျှင် သိနိုင်သည်။

ပြည်သူအများ စိတ်၀င်စားလျက်ရှိသော NUCC ၏လုပ်ဆောင်ချက်များကို တစေ့တစောင်း ပြောပြသွားသည်။ နိုင်ငံ၏ ယေဘုယျအခြေအနေနှင့် အဖြစ်အပျက်များကို အကြမ်းဖျင်းပြောပြသွားသည်။ ပြည်သူတွေရဲ့ ခံစားချက်ကို သူပြန်ပြောင်းပြောပြသည်မှာ ၀မ်းသာ၀မ်းနည်းပင်။ အိမ်မီးရှို့ခံရသူ ပြည်သူတွေရဲ့ စကားတိုင်းမှာ နောက်တွန့်ခြင်း ကြောက်ရွံခြင်း အလျင်းမရှိ၊ တော်လှန်ရေး အောင်မြင်ဖို့ရာ တထောင့်တနေရာမှ ပေးဆပ်လိုက်သည်ဟူသာ ခံယူထားကြသည်ဟု ဆိုသည်။ အခက်အခဲ ဒုက္ခမျိုးစုံနှင့်နပန်းလုံးနေသောပြည်သူ‌များ၏ မာကျောသောစိတ်ဓာတ်၊ ပြင်းပြသော စိတ်ဓာတ်တွေကြောင့် တော်လှန်ရေးက အောင်ကိုအောင်မည်ဟု ကိုတေဇာဆန်းယုံကြည်လျက်ရှိသည်။ ကျတော်တို့ တော်လှန်ခြင်းများနှင့်ခေတ်သစ်မြန်မာပြည်မှလည်း ယုံကြည်ဆန္ဒပြုရင်း ကိုတေဇာဆန်း၏ podcast ကို နားဆင်နိုင်ပြီဖြစ်ပါသည်။

အာဏာသိမ်းပြီး သူသေချာတွေးမိသည်။ သူအနေနဲ့ အဆင်ပြေနိုင်သေးသော်လည်း သူ့သူငယ်ချင်းတွေ အလုပ်ပြုတ်ကြသည်။ ထမင်းငတ်ကြသည်။ သူ့အလုပ်သမားအချို့ ဖြုတ်ရတော့သည်။ ထို့နောက် သူမိသားစုနှင့် တိုင်ပင်၍ သားငယ်ကို နမ်းကာ အာဏာရှင်တို့ခင်းသော ဆူးလမ်းကို အမှန်တရားအတွက် လျှောက်တော့သည်။

နိုင်တာအကုန်လုပ်သည်။ ဆန္ဒပြသည်။ စစ်သင်တန်းတက်သည်။ လိုအပ်သူတွေကို ကြည့်သည်။ သို့သော် စစ်တပ်က သူ့ကိုအလွတ်မပေး။ စစ်ခွေးဆ်ုသည့်အတိုင်းအနံ့ရသည့်နေရာ အကုန်လိုက်သည်။

သူကံကောင်းသည်။ မိတ်ဆွေကောင်းတွေကြောင့် လွတ်ရာသို့ အပြေးလှမ်းနိုင်ခဲ့သည်။ တော်လှန်ရေးကား အားလုံးသိသည့်အတိုင်း အရင်းအနှီးကြီးသည်။ ထိုအရင်းအနှီးများကို သူ မြုပ်နှံပြီးဖြစ်သည်။

တော်လှန်ရေးအတွက် သူနောက်မဆုတ်။ ရှေ့သို့သာ တလှမ်းချင်းတိုး၍တိုး၍သွားသည်။ သူ့ဘ၀နှင့် စူ့ခံယူချက်ကို တော်လှန်ခြင်းများနှင့် ခေတ်သစ်မြန်မာပြည် podcast တွင် တွေ့နိုင်ပါသည်။

ထို့နောက် ဒီမိုကရေစီအစိုးရလက်ထက်သို့ရောက်လာပြီး အလုပ်သမားအဖွဲ့အစည်းများ ဖွဲ့ခွင့်ရလာသည်။ ထို့ပြင်အသက်မပြည့်သေးသောသူများကို လုပ်ငန်းခွင်ဖိနိုပ်မှုများ အတင်းအဓ္ဓမ ခိုင်းစေခြင်းများမှ အထိုက်အလျောက် ကာကွယ်လာနိုင်ကြသည်။ ထိုအခွင့်အရေးကို သူမလက်လွတ်မခံ၊ အလုပ်သမားအဖွဲ့အစည်းထဲ ခြေစုံပစ်၀င်ရင်း သူမကဲ့သို့ အခြားသက်ငယ်အလုပ်သမားများ မကြုံတွေ့စေရန် ကြိုးစားခဲ့သည်။

အလုပ်သမားအရေးဆိုသည်မှာ နိုင်ငံ၏အရေးပင်ဖြစ်သည်ဟု သူမဆိုသည်။ အလုပ်သမားဟူသော အခြေခံလူတန်းစားအဆင်ပြေပါမှ နိုင်ငံအေးချမ်းပြီး အလျှင်အမြန်တိုးတက်နိုင်သည်။ မဟုတ်လျှင် တိုင်းပြည်ဆူပူပြီး မအေးချမ်းနိုင်ဟု ဆိုသည်။ လက်ရှိစစ်ကောင်စီသည် အများဆန္ဒကိုမလေးစား၊ သူ၏လက်တဆုပ်စာ အသိုင်းအဝိုင်းကိုသာ အလေးထားသောကြောင့် အကျိုးဆက်ကို အများပြည်သူခံနေရသည်ဟု သူမဖွင့်ဟသည်။ တချိန်က အနာဂါတ်ကိုတွေး၍ ၀မ်းသာခဲ့ရသော်လည်း ယခုချိန်တွင် အလုပ်သမားများ တကျော့ပြန်ဖိနိုပ်ခံရတော့မည်ကို သဘောပေါက်မိသော သူမအတွက် လက်ရှိအလုပ်သမားအဖွဲ့အစည်းဖြင့် အလုပ်သမားရေးကိုနိုင်ရာထမ်းနေသည့်သူ။ ထိုသို့ လောကဓံကို အရှုံးမပေးဘဲ လူပီသအောင်နေ,နေသော သူမရဲ့ဘ၀ဇာတ်လမ်းနဲ့ အလုပ်သမားအရေးကို ကျတော်တို့ တော်လှန်ခြင်းများနဲ့ ခေတ်သစ်မြန်မာပြည် podcast မှာ ၀င်ရောက်နားဆင်နိုင်ပြီ ဖြစ်ပါတယ်။

လက်ရှိနိုင်ငံရေးနှင့် သံဃာများ နိုင်ငံရေးမလုပ်ရဟူသော စည်းမျဉ်းကား ဘုရားဝိနည်းမဟုတ်၊ စစ်အာဏာရှင်၏ ဂျင်းဟု မိန့်သည်။ နိုင်ငံအရေးသည် အများသူငှာ အေးချမ်းရေးဖြစ်သည်၊ မြတ်စွာဘုရားသည်ပင်လျှင် အများသူငှာ ချမ်းသာစေရေးကိုသာ ရှေးရှုပြီး အမြဲဆုံးမ သွန်သင်တတ်သူဖြစ်ကြောင်း ဆရာတော်က မိန့်သည်။

ဆရာတော်သည် လက်ရှိ မြန်မာနိုင်ငံတွင်ဖြစ်ပေါ်နေသော ကိစ္စများနှင့် ပတ်သတ်၍ အကောင်းဆုံးရှင်းပြဆုံးမသွားခဲ့သည်။ ဆရာတော်၏ ဆောင်ပုဒ်ကား ဘာသာမဲ့ချင်မဲ့ပါ၊ တရားဓမ္မ မမဲ့ပါနဲ့ ဟူ၏။

အရာရာကို ၀ဠ်ကြွေး ၊ ဆုတ်ကပ် ဖြစ်နေကြသော အမှောင်ဖုံးသူတော်ကောင်းများကိုလည်း ပြောကြားသွားသည်မှာ ထုံးကို နှိုက်၍ ဖြူပြီး မီးသွေးနှိုက်၍ မဲရသည်မှာ ကံမဟုတ်ဘဲ မိမိပြုသော အမှုသာဖြစ်ကြောင်း၊ စစ်အာဏာရှင်ကို ကြောက်ရွံ့စိတ်နှင့်မိမိအသိဉာဏ်နည်းပါးမှုတို့ကို လျစ်လျူရှု၍ ကံကိုချည်း အပြစ်ဖို့မနေသင့်ကြောင်း စုံစုံလင်လင် ပြောပြသွားခဲ့သည်။

ငရဲဖြင့်ခြောက် နတ်ပြည်ဖြင့် မြောက်တတ်သော သူများ၏ ဂျင်းများမှ လွတ်ကင်း၍ စစ်မှန်သော တရားဓမ္မကို နားလည်သဘောပေါက်ဖို့ ပိုမိုအားထုတ်သင့်ကြောင်း သေသေချာချာရှင်းပြခဲ့သည်။ ထို့သို့သော ဘုရားသားတော်တပါး၏

ဒီမိုကရေစီ ဆန်သော ဆွေးနွေးချက်များကို

တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်မည်ဖြစ်ပါသည်။

ထို့နောက် ၀န်ထမ်းဘ၀တွင် သူအလွန်မျှော်လင့်ခဲ့သော ဘ၀ရပြီဟု ထင်မြင်ခဲ့မိသည်။ ထိုအမြင်ကား ကြာကြာမခံ။ အထက်ဖား အောက်ဖိများနှင့် တိုင်းရင်းသားဆို တဆင့်နိမ့်သည်ဟု ယူဆထားကြသော လူတွေကြား သူရှေ့ဆက်ခဲ့သည်။ သို့သော် သူသိထားသည်ကား နေ့စဉ် ကိုယ်ရည်ကိုယ်သွေးနိမ့်ပါးလာသည်ဟူသော အချက်ပင်။

စနစ်ကို မုန်းသည်။ ပြည်ထောင်စု ဖြစ်ဖြစ် ပြည်ထောင်ကွဲဖြစ်ဖြစ် သူသိပ်စိတ်မ၀င်စား။ လူတိုင်းအတွက် ကောင်းမွန်သော စနစ်ဖြင့် ပညာတတ်ဦးစားပေးသော အစိုးရရှိလျှင် ကျေနပ်ပြီဟု ဆိုသည်။

ရိုးရှင်းပြီး သဘာ၀ကျသော သူ၏ဘ၀၊ အစစအရာရာသည်းခံခဲ့ရသော ၀န်ထမ်းဘ၀ကို စွမ့်ပြီး မိန်းမနှင့် ကလေးနှစ်ယောက်ကို လက်ဆွဲကာ လွတ်မြောက်ရာသို့ ရွက်လွှင့်လာသော ဘ၀တစိတ်တပိုင်းကို #တော်လှန်ခြင်းများနှင့်ခေတ်သစ်မြန်မာပြည် podcast တွင် နားဆင်နိုင်ပြီ ဖြစ်ပါသည်။

တိုင်ပင်မကိုက်သော စစ်ဖိနပ်သံများကား စက်ရုံလိုင်းတန်းအတွင်း ခပ်သွက်သွက်ကြားနေရသည့်အချိန်တွင် မသဇင် ဟန်မပျက် အလုပ် ဆက်လုပ်နေသည်။ သို့သော် သူမ၏ အနီးဆုံးနေရာတွင် စစ်ဖိနပ်သံများငြိမ်သက်သွားပြီး ခက်အပ်အပ်အသံဖြင့် ခေါ်သံကို ကြားလိုက်ရသည်။ မသဇင် စက်ရုံရုံးခန်းကို ခဏခဲ့ပါဟူသောစကားဖြင့် သူမပင်မမှတ်မိလောက်သော ဆန္ဒပြဓာတ်ပုံများဖြင့် အသင့်စောင့်နေသော ရဲကားပေါ်တင်သွားတော့သည်။ ချွေးသိပ်ခဲ့သော စကားလုံးများကား ခေတ္တမေးမြန်းရန်ဟူသော ခေါင်းစဉ်ဖြင့်၊ လာခေါ်သည်ကား ရဲနှင့်စစ်သားများသာ။ အမျိုးသမီးတစ်ယောက်ကို လာဖမ်းချိန်တွင် ရဲမေ စစ်သမီးတို့၏ အရိပ်အယောင်ပင်မရှိပေ။

အတက်နိုင်ဆုံးစိတ်ကိုတည်ငြိမ်အောင်လုပ်ရင်း ရဲစခန်းတနေရာသို့ ပါသွားခဲ့သည်။ သို့သော် ထိုမျှနှင့်မပြီး၊ အခန်းကျဉ်းတခန်းအတွင်းရှိ ထိုင်ခုံတခု‌ပေါ် လက်နောက်ပြန်လက်ထိပ်ခက်ထားရင်း မေးခွန်းများထရပ်စပ်မေးတော့သည်။ နောက်ဆုံး လိုချင်သောအဖြေကားမရသည့်အချိန်တွင် စစ်သားတစ်ယောက်က အရှိန်ဖြင့် ပြေးကန်ချက်တွင် မသဇင်တစ်ယောက် သတိမေ့ သွားခဲ့တော့သည်။ ဝုန်းကနဲ အသံကြားရပြီး အေးခဲစပ်ဖျင်းမှုတို့ဖြင့် သတိရလာရင်း စစ်ကြောရေးပို့မယ်ဟူသောအသံကြားလိုက်ရသည်။ သူမ ဘာမှတွေးမနေတော့။ စိတ်ကို အတည်ငြိမ်ဆုံးဖြစ်အောင်ထိန်းရင်း တစ်ကိုယ်တည်း အတွေးနယ်ချဲ့နေမိတော့သည်။

သို့သော် သူမကံကောင်းသည်။ စစ်ကြောရေးစခန်းများ မအားလပ်၍ ထောင်ချဖို့ပြင်ဆင်တော့မည်ဟုကြားရသည်။ ဤသို့ဖြင့် နွေဦးသဇင်တစ်ယောက် အင်းစိန်အကျဉ်းထောင်ဆီသို့ ခြေလှမ်းစခဲ့ရတော့သည်။ အင်းစိန်ထောင်တွင် သူမ တန်းစီးဖြစ်ခဲ့သည်။ အကျဉ်းခန်းထဲက ဘ၀တွေကို ကြိုးစားဖေးမခဲ့သည်။ သူမကြိုးစားရုန်းကန်ခဲ့သမျှကို ကျနော်တို့ #တော်လှန်ခြင်းများနှင့်ခေတ်သစ်မြန်မာပြည်podcast တွင် ရင်ဖွင့်ပြောပြခဲ့ပါတယ်။ အောက်က link ကို နိုပ်ပြီး ၀င်ရောက်နားဆင်နိုင်ပါတယ်။

သူဆန္ဒကား ရှင်းသည်။ မြန်မာပြည်ကိုပြန်လည်ဦးမော့လာနိုင်ရန် အဓိကအချက်သည် ပညာရေးပင်။ အနှစ်သာရမရှိ စာရွက်ပေါ်ကပညာရေးကို သူမနှစ်မြို့။ နိုင်ရာ၀န်ထမ်းရင်း ရှေ့ဆက်နေသည်။တခါတခါ ဘ၀က ဝိုးတဝါးဟု ခဏခဏ ညည်းတတ်သည်။ အသက်ငယ်သော်လည်း အတွေအကြုံက လူကြီးဆန်နေသော လူငယ်ဆရာတစ်ယောက်။ ထိုသူ၏ ဘ၀ခရီးကြမ်းကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်ပြီ ဖြစ်ပါသည်။

မြန်မာနိုင်ငံသည် ခေတ်အဆက်ဆက် စစ်အာဏာရှင်များလက်အောက်တွင် မွဲပြာကျနေခဲ့သည်။ အတော်အသင့်လွတ်လပ်ပြီး ပြန်လည်ဦးမော့ဖို့ အရာရာ အားယူနေရချိန်တွင် ဖြတ်ရိုက်ချခံရသလို ကိုစိုးခံစားရသည်။ လူငယ်များ၏အနာဂါတ်ကား ရေစုန်မျောပြီဟု သူနားလည်ထားသည်။ ထို့ကြောင့် နည်းစုံလမ်းစုံဖြင့် သူတော်လှန်သည်။

Digital တော်လှန်ရေးမှ ငြိမ်းချမ်းစွာတော်လှန်ရေး၊ ထို့နောက် လက်နက်ကိုင်တော်လှန်ရေးဆီသို့ သူဆက်သွားခဲ့သည်။ အဖွဲ့အစည်းမျိုးစုံဖြင့် ထိတွေ့ခဲ့ရပြီး အခြေခံသဘောသဘာကို ခြုံငုံမိလာချိန်တွင် သူနားလည်သော တော်လှန်ရေးကို သဘောပေါက်လာခဲ့သည်။

နွေဦးတော်လှန်ရေးမှ မွေးဖွားလာသူပီပီ တော်လှန်ရေးအစိုးရ NUG ကို အစိုးရတရပ် ပီပီပြင်ပြင် ဖြစ်စေချင်သူ၊ တိုင်းရင်းသားသွေးပါသော ကပြားတစ်ယောက်ဖြစ်ပြီး လက်ရှိအချိန်တွင် ရိုးသားမှုနှင့် ပွင့်လင်းမြင်သာမှုကို အခြေခံသော စနစ်ကို မျှော်လင့်နေသူ၊ တော်လှန်ရေး မကြာခင်ပြီးဆုံးတော့မည်ဟုလည်း မျှော်လင့်နေသူ။

သူ၏ ဘ၀အ‌တွေ့အကြုံများနှင့် တော်လှန်ရေးအပေါ် ခံယူချက်များကို တော်လှန်ခြင်းများနှင့်ခေတ်သစ်မြန်မာပြည် podcast တွင် ၀င်ရောက်နားဆင်နိုင်ပြီဖြစ်ပါသည်။

နိုင်သည့်ဖက္မှ အစွမ်းကုန်ထမ်းသည်။ သတင်းမီဒီယာလွတ်လပ်ခွင့်နှင့် လုပ်ပိုင်ခွင့်ကို ရရှိရန် အမြဲကြိုးစားအားထုတ်ခဲ့သူ။

သူ၏ကြိုးပမ်းမှုကြောင့် အပြစ်မဲ့ပြည်သူများ အသက်ချမ်းသာရာ ရဖူးသည်။ အများပြည်သူ၏ အားပေးထောက်ခံမှုဖြင့် သတင်းသမားဘဝကို ပညာရှင်ဆန်ဆန် တည်ဆောက်ခဲ့သော ကိုသူရ၏ ဘဝကို အစပျိုးတိုက်ခတ်လာသည့် မုန်တိုင်းကား အာဏာသိမ်းမှုပင်။

စစ်ကောင်စီ၏ သတင်းစာရှင်းလင်းပွဲကို တက်ရောက်ရန် အငြင်းပွားလျက်ရှိသည့် အခြေအနေတွင် သူစဥ်းစားမိသည်ကား ပြည်သူ့မျက်နှာ။ ကမ္ဘာ့ပြည်သူ မြန်မာ့ပြည်သူများ သိလိုသည်များကို စစ်ကောင်စီထံ မေးမြန်းရန် တာဝန်ကား သတင်းသမား၏တာဝန်။ ထို့ကြောင့် ပြည်သူများ သိလိုသော အကြောင်းအရာများကို စစ်တပ်ပြန်ကြားရေးအရာရှိအား ထိပ်တိုက္မေးမြန်းသည့်အခါ စစ်အာဏာရှင်၏သရုပ်ကား လုံးလုံးပေါ်လာတော့သည်။ သတင်းစာရှင်းလင်းပွဲအပြီး ရက်ပိုင်းအတွင်း အကြောင်းပြချက္မျိုးစုံဖြင့် စစ်ကျောရေးစခန်းသို့ ဖမ်းဆီးခေါ်ဆောင်ခံရပြီး ဘယ်လက်တဖက် ကောင်းကောင်း အလုပ်မလုပ်တော့။ ကြောက်လန့်သော်လည်း စစ်အာဏာရှင်အပေါ် ဘယ်လိုနည်းနဲ့တော်လှန်ရမလဲ အမြဲတွေးနေပြီး

ဒေါ်အောင်ဆန်းစုကြည်ပြောသော "စစ်မှန်သောသတ္တိဟု ဆိုသည့် ကိုသူရ။ ပြည်သူများ သတင်းအမှန်ရရှိရေးနှင့် မျက်စိပွင့်နားစွင့်နိုင်ရန် အခက်အခဲမျိုးစုံကို ရင်ဆိုင်ရင်း တာဝန်ကျေသောသူ၊ ထိုသူ၏ တော်လှန်ရေးအပေါ်ထားသည့်စိတ်၊ ထိရောက်သောလုပ်ဆောင်ချက္များနှင့် သုံးသက်ချက္များကို တော်လှန်ခြင်းများနှင့်ခေတ်သစ်မြန်မာပြည် podcast တွင် နားဆင်နိုင်ပြီ ဖြစ်ပါသည်။

တရားမ၀င်စစ်အာဏာသိမ်းပြီးချိန်တွင် ရိုးသားကြိုးစားသော သူမ၏ ဘ၀ကို မေးခွန်းပေါင်းများစွာ မေးရတော့သည်။ တနေကုန် နေမထိ ထိုင်မသာဖြင့် အခွင့်အရေးရသည်နှင့် ပြည်သူ့၀န်ထမ်းဘ၀ကို ရွေးချယ်ခဲ့တော့သည်။ ပထမဆုံး ထိခိုက်သည်မှာ မိသားစု၊ ၀န်ထမ်းအိမ်ယာမှ ဆင်းပေးရသည်။ ထို့နောက်ဆန္ဒပြပွဲများတွင် တောက်လျှောက်ပါ၀င်ရင်း စစ်ကောင်စီလက်ချက်ကြောင့် မိသားစုနှင့်အတူ လွတ်ရှာရှောင်ပုန်းရတော့သည်။ ရေမီးအနေအထိုင် အကုန်ခက်ခဲသော အမျိုးများရှိရာတောင်ပေါ်တွင် ပုန်းရှောင်ခဲ့ရပြီးနောက်ဆုံးတွင် သူမမိဘများရှိရာ ရွာသို့ ပြန်ခဲ့ရတော့သည်။ မကြာပါ၊ မြို့နယ်ဆရာ၀န်ကောင်းမှုဖြင့် စစ်သားများ အိမ်သို့ ဆိုက်ဆိုက်ရောက်လာပြီး ဖမ်းခေါ်ခံရတော့သည်။ ထိုအချိန်တွင် သမီးငယ်က တနေ့ကုန်အန်ပြီး နလံပင်မထူနိုင်သည့်အချိန်။ လူမဆန်သော သူများ၏ စီစဉ်မှုအောက်တွင် ကလေးပါ အချုပ်ထဲ အိပ်ခဲ့ရသည်။ ကံကောင်းထောက်မ၍ ကလေးနေပြန်ကောင်းသော်လည်း သူမကတော့ ငြိမ်းချမ်းစွာဆန္ဒပြပြီး အကြမ်းမဖက် အာဏာဖီဆန်မှုကြောင့် ထောင်နှစ်လ ကျခဲ့ရတော့သည်။ ထို့နောက် စွန့်စားမှုအစုံဖြင့် လွတ်မြောက်ရာသို့ တိမ်းရှောင်လာရပုံနှင့် ဘ၀အခက်အခဲများကို တရွေ့ရွေ့ကျော်ဖြတ်လာပုံကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်မည်ဖြစ်ပါသည်။

သူမ ဆုံးဖြတ်ချက်တခုကို အသေအချာ ချလိုက်သည်မှာ လက်နက်ကိုင်အဖွဲ့အစည်းများဆီသို့ပင်။ အဖေတခုသမီးတခုဘ၀ကနေ တကောင်ကြွက်တော်လှန်ရေးသမားဘ၀ကို သူမ ခြေစုံပစ် ၀င်ခဲ့တော့သည်။ ထိုနောက် ကြုံတွေ့ရသော သူမ၏အတွေ့အကြုံများနှင့် သူမ၏ အတွေးအခေါ်များကား ဘ၀ပန်းချီကားတစ်ချပ်ကဲ့သို့ ဆေးရောင်စုံလှသည်။ ထိုအကြောင်းအရာများကို

' တော်လှန်ခြင်းများနှင့် ခေတ်သစ်မြန်မာပြည် podcast' တွင် နားထောင်နိုင်မည်ဖြစ်ပါသည်။

ဇနီးလောင်းတယောက်ဖြစ်သလို ရှေ့ဆက် ဘ၀ကို ဂီတဖြင့် မြုပ်နှံထားသူတစ်ယောက်လည်း ဖြစ်သည့်သူမ၊ မဟုတ်မခံချင်စိတ်ဖြင့် အားနည်းသူကို အမြဲဖေးမကူရင်း ‌နွေဦးတော်လှန်ရေးကို ခရီးဆက်နေသည်။ စစ်ကောင်စီက ကိုဇေယျာသော်အပါအ၀င် လေးဦးကို ကြိုးမိန့်ပေးရန် ပြင်ဆင်နေချိန်တွင် သူမ၏စိတ်ဓာတ်ရင့်ကျက်မှုအတိမ်အနက်ကို ပိုမိုမြင်သာလာစေသည်။ သူမ၏ ဘ၀လက်တွဲဖော် ကိုဇေယျာသော်ကို အရင်ကတည်းက လေးစားချစ်ခင်ခဲ့သည်ဟု သူမဆိုသည်။ အလွန်အေးချမ်းပြီး ကိုဇေယျာသော်ကြောင့် သူမ၏ စိတ်မြန်မှုကို ထိန်းနိုင်ခဲ့ရပြီး တဖြည်းဖြည်း အေးချမ်းလာရသည်ဟု သူမ ခပ်ငေးငေးပြောပြသည်။ ထိုသို့အေးချမ်းစွာနေတတ်ပြီး အများလေးစားရသူတစ်ယောက် ပြည်သူ့ခုခံစစ်တွင် ပါ၀င်ပြီး အကြမ်းဖက်သမားစွပ်စွဲကာ ကြိုးပေးခံရတော့မည့်အချိန်တွင် မသဇင် မည်သို့မည်ပုံ ဖြေသိမ့်နိုင်ပါအံ့နည်း။

သို့သော် သူမတောင်းဆိုသည်ကား ရှင်းသည်။ ပြည်သူတွေ အားလုံးပါ၀င်လျှင် ပိုမြန်မည်ဟုဆိုသည်။ "အသက်ပေးရသူတွေလည်း များလှပါပြီ။ အမလို ဒုက္ခရောက်နေကြရတဲ့သူတွေ ပူဆွေးသောကရောက်နေတဲ့သူတွေ ဒုနဲ့ဒေးဆိုတာ ပြည်သူတွေကို မြင်စေသိစေချင်တယ်။ အချို့က မြင်ကြ ကြားကြပါလျက် မျက်နှာလွဲနေနိုင်ကြသူတွေကို ကျမ အလွန် အံ့ဩ၀မ်းနည်း ဖြစ်ရပါတယ်"လို့ ဆိုပါတယ်။

သူမရဲ့ ရင်ဖွင့်စကားတွေနဲ့ ကိုဇေယျာသော်နဲ့ပတ်သတ်တဲ့ ခံစားချက်တွေကို တော်လှန်ခြင်းများနဲ့ခေတ်သစ်မြန်မာပြည် Podcast မှာ နားထောင်ရင်း နွေဦးတော်လှန်ရေးကို တထောင့်တနေရာမှ ပါ၀င်နိုင်သော နိုင်ငံသားကောင်းများ ဖြစ်ကြပါစေခင်ဗျာ။

သို့သော် ဘ၀က ရိုးရှင်းသယောင်ယောင်ဖြင့် ဆန်းသည်။ သေချာပြီဟု ထင်ထားသမျှ အကုန် ပျောက်လေပြီ။ စစ်တပ်က တရားမ၀င် အာဏာသိမ်းသည်။ စာအုပ်တိုက်တော်တော်များများ ပိတ်သွားသည်။ ပြည်သူအများစုလည်း စတင်သပိတ်မှောက်တော့သည်။ ကိုထူးကို စာအုပ်ထုတ်ပေးမည့် စာအုပ်တိုက်ပိုင်ရှင်ကား ဆန္ဒပြပွဲရောက်နေပြီဖြစ်သည်။ ကိုထူး၏ စာပေအသိများကလည်း လက်ရှိအခြေအနေကို ကောင်းကောင်းသဘောပေါက်စေသည်။ ထို့ကြောင့် ကျောင်းသားသပိတ်များတွင် ပါ၀င်လှုပ်ရှားရင်း မြန်မာစစ်တပ်၏ အကြမ်းဖက်များ စတင်ချိန်တွင် အခြေအနေကို သေချာသုံးသပ်နေခဲ့သည်။ လမ်းစရိတ်အတွက် ရရာအလုပ်ကို နှစ်လခန့် ရုန်းကန်ရင်း လွတ်မြောက်နယ်မြေသို့ ခြေဆန့်ရင်း ကဗျာရေးသောလက်များကို လက်နက်ကိုင်သောလက်များအဖြစ် ပြောင်းလဲခဲ့သည်။ ဆေးတပ်တွင် ၀င်ရောက်စစ်မှုထမ်းပြီး သေနတ်တဖက် ဆေးထိုးအပ်တဖက်ဖြင့် ရှေ့တန်းသို့ အကြိမ်ကြိမ်ရောက်ခဲ့ရသည်။ သို့သော် နယ်မြေခံအဖွဲ့၏ စီမံဆောင်ရွတ်မှုနှင့် ရည်ရွယ်ချက်ကို တဖြည်းဖြည်း သိမြင်လာပြီး လက်နက်ကိုင်တော်လှန်ရေးသည် ကိုထူးအတွက် ဝေဝါးသော အိမ်မက်တခု ဖြစ်လာခဲ့သည်။ တနေ့ ကိုထူး၏ လက်နက်ကိုင်သောလက်ကို အရှိန်ပြင်းပြင်း ပုတ်ချခံရသည် နေ့ရက်တွေရောက်လာခဲ့သည်။ အထက်ပါအကြောင်းအရာများကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်ပြီ ဖြစ်ပါသည်။

သို့သော် ကိုယ်တိုင်ရပ်တည်နိုင်ရေးအတွက် အလုပ်ပြန်၀င်ခဲ့ရပြီး အခြေအနေကို စောင့်ကြည့်နေခဲ့သည်။ မိမိအိမ်သို့ စစ်ဆေးမေးမြန်းလာချိန်တွင် လွတ်မြောက်နယ်မြေသို့ ချေဆန့်ခဲ့ရတော့သည်။ ကိုခန့်ရဲ့ ခံယူချက်က ရှင်းသည်။ နိုင်ရာတာ၀န်ထမ်းမည်၊ အသက်စွန့်ရမည်ဆိုလျှင် မကြောက်၊ နိုင်ငံအတွက် ဘ၀ကို ရဲရဲပေးလှူထားပြီးဖြစ်သည်။ အလုပ်အကိုင်အခွင့်အလမ်း၏ အခက်အခဲ ပညာတတ်မြောက်ရန် အခက်အခဲတွေကို ကိုခန့်ကောင်းကောင်းနားလည်သည်။ သက်တူရွယ်တူများနှင့် အငယ်တွေကို သူ့လိုဒုက္ခမျိုးတွေ မကြုံစေချင်တော့ဟု ဆိုသည်။

ရသလောက်သင်တန်းတွေတက်သည်။ နိုင်ရာတာ၀န်ထမ်းရန် အကုန်လုပ်သည်။ သို့သော် သူ့ရဲ့ စိတ်ဒဏ်ရာတွေကလည်း မသေး။ ငှက်ပျောအူမစားရသော်လည်း ငှက်ပျောအူကဲ့သို့အစာများဖြင့် အသက်ဆက်ခဲ့ရသော ဘ၀တွေလည်းရှိသည်။ ထမင်းမစားရသောရက်တွေလည်း ရှိခဲ့သည်။ ဤကား အပဟိကဟု ဆိုသည်။ သို့သော် ပြဿနာက ရှေ့တန်းပင်။ စစ်တိုက်ရမည်ဟုပြောပြီး လမ်းလျှောက်ပြန်ခဲ့ရသော တိုက်ပွဲများမနည်း၊ ပြည်သူ့အတွက်ဟု သစ္စာဆိုပြီး မျက်စိရှေ့တွင် ပြည်သူ‌တွေ ပြေးနေတာကို ကြည့်နေခဲ့ရသည်။ မတရားအမိန့်ကို နားလည်သဘောပေါက်လာချိန်တွင် လက်နက်ကိုင်ရခြင်း၏ ရည်ရွယ်ချက်တွေ ပျောက်ဆုံးလာသည်ဟု ဆိုသည်။ နောက်ဆုံးရှေ့တန်းမှ ပြန်လာချိန်တွင် လိုအပ်သော အကူအညီများအတွက် ဆိုင်ရာလူကြီးများကို ဆက်သွယ်တိုင်ပင်သော်လည်း ဘာမှအရာမထင်။ ဤသို့ဖြင့် လက်နက်ကိုင်ဘ၀ကို စွန့်လွတ်ခဲ့တော့သည်။ ကိုခန့်၏ အတက်အကျများဖြင့်ဘ၀ကို

တော်လှန်ခြင်းများနှင့် ခေတ်သစ်မြန်မာပြည် podcast ‌တွင် နားဆင်နိုင်ပြီ ဖြစ်ပါသည်။

ကိုသန့်၏ဘ၀က ရိုးရှင်းသည်။ မိဘအသိုင်းအဝိုင်းကား စစ်တပ်အသိုင်းအဝိုင်းဖြစ်သည့်အပြင် ကိုယ်တိုင်ကလည်း အေးအေးချမ်းချမ်းနေချင်သည်။ ထို့ကြောင့် မိဘအလိုကျ စစ်သားတစ်ယောက်ဖြစ်လာခဲ့သည်။ သင်တန်းကာလကို ခက်ခက်ခဲခဲ ဖြတ်သန်းရင်း နေရာတစ်ခုရလာခဲ့သည်။ သို့သော် ဖိနိုပ်မှုကား မလွတ်။ အကြောင်းပြချက်မျိုးစုံဖြင့် လစာဖြတ်ခံရသည်။ ၀န်ထမ်းတစ်ဦးထက်ပိုသော တာ၀န်များဖြင့် စိတ်ကျဉ်းကျပ်စွာ ဖြတ်သန်းရင်း ဘ၀ပင် အသားကျသလို ဖြစ်ခဲ့သည်။ ဘယ်လိုပဲ ဖြစ်ဖြစ် နေပျော်အောင်ကြိုးစားသည်။ ခက်ခဲမှုများသည် ကိုသန့်အတွက် ပုံမှန် ဖြစ်ရိုးဖြစ်စဉ်တခုလို ဖြစ်လာခဲ့သည်။

မိမိ၏စစ်တပ်မှ အာဏာစသိမ်းချိန်တွင် တပ်တွင်းမှာ အာဏာသိမ်းမှန်းမသိကြပေ။ သို့သော် ဆန္ဒပြပွဲများ တော်လျှောက်ဖြစ်လာပြီး ပြည်သူများ လမ်းမပေါ်ရောက်လာချိန်တွင် အာဏာသိမ်းမှုဖြစ်မှန်း သေချာသိခဲ့ရသည်။ သို့သော် သေချာသော ဆုံးဖြတ်ကား မရှိသေး။ အခြေအနေကို စောင့်ကြည့်ရင်း မိမိစစ်တပ်၏ မျက်နှာဖုံးကွာကျလာသည်ကို မျက်ဝါးထင်ထင် မြင်လာခဲ့သည်။ ဆန္ဒပြပွဲများအတွင်းတွင် သူငယ်ချင်းတစ်ယောက်က သူနှင့် မျက်နှာချင်းဆိုင်တွေ့ချိန်တွင် အမိန့်ကြောင့် ပစ်ရခတ်ရမည်ဆိုလျှင် ဘာလုပ်မလဲဆိုသော မေးခွန်းကို သေချာစဉ်းစားရင်း အကြမ်းမဖက်အာဏာဖီဆန်ရေးလှုပ်ရှားမှုတွင် ပါ၀င်ခဲ့တော့သည်။

အစပိုင်းတွင် စိတ်ထဲ မတင်မ‌ကျဖြစ်သော်လည်း တော်လှန်ပြည်သူများ၏ နွေးထွေးမှုနှင့် သူငယ်ချင်းများ၏ ဖေးမ နွေးထွေးမှုက သူ့ကို ဂုဏ်ယူစေသည်ဟုဆိုသည်။ ကိုယ့်ဆုံးဖြတ်ချက်နှင့် ကိုယ်တိုင်ရွေးချယ်မှုဟု ခံယူထားသည့်အတွက် ကြုံလာမည့် ဒုက္ခ သုခများကို အားတင်းကျော်ဖြတ်မည်ဟု ဆိုသော ကိုသန့်၏ ဘ၀စာမျက်နှာအချို့ကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်စီးမြောနိုင်မည် ဖြစ်ပါသည်။

ပြည်သူများ အမှန်မြင်၍ အမြင်မှန်နိုင်ကြပါစေ။

သို့သော် ကိုဖြိုးမျှော်လင့်မိသည်ကား မိမိခေါင်းဆောင်တင်ထားသော နိုင်ငံရေးသမားများထံမှ ထိရောက်သော စီမံခန့်ခွဲမှုနှင့် ထိရောက်သော လုပ်ဆောင်ချက်များပင်။ သူဖြတ်သန်းလာသော လက်တွေ့ဘ၀တွင် အိပ်စိုက်ကများသည်။ နောက်ဆုံး ဖူးဖူးမှုတ်ထားပြီး အားကိုးသော မိဘပင်သူ့အပေါ် မကြည်ဖြူတော့ပေ။ အရာရာကို ပညာရှင်ဆန်ဆန်တွေးခေါ်တတ်သော ကိုဖြိုး၏ဘ၀တွင် ကြီးမားသော ထိုးနှက်ချက်ကား တန်ဖိုးထားသော တော်လှန်ရေး၏ အတွေ့အကြုံများပင်ဖြစ်၏။ လူပေါင်းများစွာဖြင့်ထိတွေ့ဆက်ဆံသော ထောက်ပို့ဘ၀၏အတွေ့အကြုံများကား သူ၏တော်လှန်ရေးစိတ်ဓာတ်ကို ခလုတ်တိုက်လျက်ရှိသည်။ မည်သို့ပင် ဖြစ်စေ သူဖြစ်စေချင်သော အရာကား ရိုးရှင်းသည်။ တော်လှန်ရေး၏အနှစ်သာရကို လူတိုင်းရစေချင်သည်။ သို့သော် ဘယ်လိုအရာများက သူ့စိတ်ဓာတ်နှင့် တော်လှန်ရေးခရီးကို တိုက်ခိုက်နေပါသနည်း။

သူရဲ့အတွေအကြုံများနှင့် ခံစားချက်၊ မျှော်လင့်ချက်နှင့် သုံးသတ်ချက်တို့ကို တော်လှန်ခြင်းများနှင့် ခေတ်သစ်မြန်မာပြည် podcast မှာ နားဆင်ရမှာ ဖြစ်ပါတယ်ခင်ဗျ။

သူမဘာကြောင့် EAOs တွေဆီ သွားရောက်ခိုလှုံရတာလဲ၊ လက်နက်ကိုင်တော်လှန်ရေးကို ဘာကြောင့် ရွေးချယ်ခဲ့တာလဲဆိုတဲ့ အကြောင်းပြချက်တွေက သိပ်ကို ရိုးရှင်းပြီး လက်တွေ့ကျတဲ့ အကြောင်းအရာတွေ ဖြစ်နေပြန်ပါတယ်။

မိန်းကလေးတစ်ယောက်ဖြစ်ပေမယ့် နွေဦးတော်လှန်ရေးရဲ့ ခုလုတ်ကန်သင်းတွေကို ကြိုးစားရုန်းကန်ကျော်ဖြတ်ခဲ့တဲ့ သူမရဲ့ အာဂသတ္တိ၊ သူငယ်ချင်းတွေအပေါ် ကာကွယ်တတ်တဲ့ ခေါင်းဆောင်စိတ်၊ လက်တွဲဖော်ကို နားလည်တတ်တဲ့ ကြင်နာစိတ်၊ စတဲ့စိတ်ဓာတ်တွေနဲ့ တရွေ့ရွေ့ဖြတ်သန်းခဲ့တဲ့ သူမရဲ့ဘ၀အကြောင်းကို ယခု podcast မှာ နားဆင်ကြရမှာ ဖြစ်ပါတယ်။

တိုင်းရင်းသားလက်နက်ကိုင်တွေအပေါ် အထင်နဲ့အမြင် ကွဲပြားမှုတွေ ၊ တော်လှန်ရေးအစိုးရအပေါ် မျှော်လင့်ချက်တွေနဲ့ နားလည်မှုတွေ၊ ဖြစ်သမျှအကြောင်းကို မကောင်းပေမယ့် ကောင်းဖို့အမြဲကြိုးစားမှုတွေ အစရှိတဲ့ အ‌ကြောင်းအရာတွေကို မဆုမြတ်ရဲ့ နွေဦးခရီးကြမ်းမှာ တွေ့မြင်ရမှာ ဖြစ်ပါတယ်။

မိသားစုအတွက် ဂုဏ်ယူဖွယ်သမီးတစ်ယောက်အဖြစ် ရပ်တည်ရင်း မိသားစုတစုလုံး အိုးပစ်အိမ်ပစ် ပြေးရလွှားရ အခြေအနေထိရောက်ခဲ့ပေမယ့် လောကဓံကို ခေါင်းမော့ရင်ကော့ပြီး ပြုံးပြုံးကြီး ရှေ့ဆက်နေတဲ့ သူမတို့ မိသားစုဟာ နွေဦးတော်လှန်ရေးရဲ့ ပြယုဒ်တစိတ်တပိုင်း ဖြစ်ပါတယ်။

သူမရဲ့ ဖြတ်သန်းကျော်ဖြတ်လာတဲ့ နွေဦးရက်ရှည်များကို နားထောင်ရင်း မိမိရဲ့ကိုယ်တိုင်ခံစားရတဲ့ ခံစားချက်‌တွေကို မျှဝေသွားဖို့လည်း မျှော်လင့်ပါတယ်။